انت معترض على ايه ؟

اشتمنى ماشى شكرا بس قول لى انت معترض على ايه علشان اعترض معاك:

 
- على اعادة محاكمة قتلة الثوار ؟
- تكوين نيابه خاصة للتحقيق مع القتله ؟حتى لايعبث بها فلول الماضى ؟
- تحصين القرارات
- رفع معاش المصابين بعجز كلى مثل الشهداء؟
- اقالة الفاسد العام؟
- خفض سن القضاة لتطهيرهم من زندهم ؟
- مد فترة عمل التاسيسيه علشان موضوع السلق اللى خرجوا علشانه؟
- ديكتاتور لمدة شهرين كمان ولا نرجع لمربع الصفر لاتاسيسيه ولا شورى ويصبح دكتاتورا الى مالا نهايه حتى نتوافق ولن يحدث هذا
- قل لى بالله عليك بعد ما تخلص سبابك انت معترض على ايه ؟ وعاوزها تمشى ازاى؟

المواطن المصري المسلم مش فاهمين الالف من كوز الدرة !

الموضوع دا دار بينى وبين المواطن المصري المسلم الحوار ده من فتره بس افتكرته مش عارف ليه انهارده بتفرج ع استفتاءات الفيسبوك ! الاستفتاء كان بخصوص تولي الاخوان الحكم وكمان بعديه استفتاء وراه ع طول عن اقامة الشريعة الاسلامية في مصر.

اللي لفت نظري بجد وخلاني افتكر الحوار مع المواطن المصري المسلم ده ان اصحابي اللي قالوا لأ للاخوان على الاستفتا قالوا نعم لتطبيق الشريعة المصرية في مصر ف حسيت شوية اني عايز اضحك او يمكن الطم او يمكن اهاجر واريح دماغي بجد !

الحوار كان كالتالي:

انا: يعني انت مع تطبيق الشريعة الاسلامية في مصر

المواطن المصري المسلم: طبعا! شرع الله لازم يطبق ولا غنى عن دولة خلافة الله في الارض

انا: يعني معنى كده انك هتصوت للاخوان لو نزلوا انتخابات نزيهة

المواطن المصري المسلم: اعوذ بالله اخوان ايه يا بس يا عم

انا: ليه مالهم الاخوان؟

المواطن المصري المسلم: يا عم دول ناس هتيجي تجلدنا في الشوارع وتقطع بأه ايد السارق وترجم الزاني! احنا مش هنرجع للقرون الوسطى

اهو كل اصحابي اللي صوتوا بلا للاخوان وبنعم للشريعة الاسلامية كلهم المواطن المصري المسلم مش فاهمين الالف من كوز الدرة ! لكي الله يا مصر

مصرى الجنسية..

الي السيد الرئيس المحترم محمد مرسي
انت يا سيادة الرئيس قمت بثورة داخلية بينك وبين نفسك عندما تم قصف عزة واقولها بكل صدق ان غزة والغزاوين والفلسطنين جميعا في القلب ونحن علي اتم الاستعداد ان نكون فدائين لتحرير القدس وفلسطين جميعا ...اين انت يا سيادة الرئيس الان من مجزرة شارع محمد محمود الان التي في وسط القاهرة وهو الشارع الشهير المؤدي الي وزارة الداخلية ..تعيد لنا المشاهد الان الي حكم العسكر وحكم المخلوع سابقا ...اين انت وابنائك واهلك وعشيرتك يقتلون بعضهم البعض اين انت؟اين انت من دماء تسير من الطرفان لا اقول انهم فلسطنيون ولا اسرائليون بل انهم مصريون والله هم مصريون الا يعد بأمكانك الان ان تغضب وتثور الي المصريون ...ام انت تسير علي نهج المخلوع ونهج العسكر في ادارة شئون البلاد ...ام انهم ماذالو يحكمون وانت لاتحكم ..اجب علي نفسك واغضب قبل فوات الاوان !

كلام .. كلام .. كلام

انا هقول كلام

والمسؤلين هيقولو كلام
والحكومه هتقول كلام
والاعلام هيقول كلام
وانتو هتقولو كلام

وكلو
كلام كلام كلام
وبعدين محدش هيعمل حاجه

وف الاخر بيموت البشر، و الكلام مش بيموت !

بـــيــشــتـغـلونـا .

بصو من غير لوك لوك ولا كلام كتير
اصحو معايا كدة علشان انا مش عاوز وجع دماغ الموضوع و مافية صباح القنوات الفضائية بتاعة مسابقات الاشتغالات
يخربيت الهبل يعنى انا كل لما بتفرج على اى قناة منهم بيجيلى تخلف عقلى
القناة دى تلاقيها جايبة السؤال يخربيت الهيافة يعنى لو جبت عيل فى كى جى وان هيحلة


وتلاقى الناس تتصل و تجاوب غلط شوفت الحوار دة مرة واتنين وتلاتة و مليون

و الله انا فى الاول قولت اما اجرب كدة و اتصل هخسر اية اتصلت تلاقى اغنية 5 دقايق

بعدها مرحبا بكم فى قناة (تييييت علشان مانعملهاش اعلانات) للغة العربية اضغط 1

للانجليزية اضغط 2 المهم فضلت ماشى تاتا تاتا و خطى العتبة مع المكالمة

انى اوصل للمزيعة ابدا كل شوية اغنية بعدها لو عايز تكسب جايزتنا اتصل يلا على رقم بلدك

الله الله الله اومال انا بعمل اية شاى بالنعناع مثلا مانا بتنيل اهو و بتصل

و فى الاخر تلاقى شكرا لاتصالكم بنا يا خبر ابيض و منقط بحكلى بعد مكالمة مدتها نص ساعة

و الدقيقة ب جنية و نص تقولى شكرا يالهوى على الاشتغالات يا جدعااااان

لا ولا اللى بقى بجد يخلى الواحد عايز ينتحر البرنامج اللى اسمو (تييييت علشان مانعملهاش اعلانات)

على قناة (تييييت) يفضلو يجيبو حاجات سهلة وهايفة اوى و بردو الناس تحلها غلط بس

بيكسبو بردو طب ازاى مش فاهم ( ياحلاوتك يا طعم يا نايتى يا سيد امك ) حليت غلط و كسبت يا حلاوة المولد

هل حد فيكم مرة دماغو قالتلو امشى ورا الاشتغالات دى ولا انا الوحيد اللى دماغى ضاربة

العقل البضين فى الكرش التخين !

جمله ملهاش اى لازمه فى حيتنا, من كام يوم كنت بلعب كوره, فإفتكرت أيام ما كنت فى المدرسه لما كنت بشوف لوحه متعلقه فى الملعب مكتوب عليها العقل السليم فى الجسم السليم, و أكيد طبعاً الجمله دى كانت موجوده فى كل مدارس مصر, بس السؤال هو إيه مدى تطبيقنا و إقتناعنا بيها

فى المدارس بتعتبر حصه الألعاب دى كلام فارغ و ممكن جداً مدرس العربى ياخدها علشان مزنوق فى المقرر إللى منزلاه الوزاره و كمان لعب إيه و هباب إيه,و إنت جاى المدرسه تتعلم و لا تلعب , جيل آخر زمن, و بالتالى مفيش مشكله إن الملاعب يتبنى عليها مبانى و مفيش أى رياضه فى المدارس و لا جسم سليم و لا أى حاجه

طيب بلاش تلعب فى المدرسه, إنزل إلعب بعد ما تروح البيت, بس فى مشكله, حتلعب فيين؟ طبعاً حتقوللى فى النادى....طيب هو إنت مشترك فى اى نادى؟ طيب معاك فلوس تشترك فى أى نادى؟ طيب الأهم من ده كله حتى لو إنت مشترك فى نادى, أهلك حيوافقوا إنك تنزل تلعب فى أيام الدراسه؟؟

من الآخر كده الأسر المصريه عباره عن شوية ترابيس, يعنى هم عندهم إقتناع غريب إن غلط جداً إنك تمارس رياضه فى أيام الدراسه و إن العيال إللى بيلعبوا دول شويه عيال بايظه و فاشله و مالهومش أهل يربوهم, و علشان كده مش غريب إن الرياضه فى مصر يبقى مستواها ضعيف و تاريخنا فى الرياضه مالوش أى لازمه

إللى أنا عايز أقوله ليه بنعتبر إن فى تناقض ما بين الرياضه و الدراسه؟ بالعكس دول بيكملوا بعض, و عن تجربه شخصيه أنا بحس إن نفسيتى مرتاحه لما ألعب رياضه باستمرار و أكيد دا بيساعدنى فى حياتى عموماً و كمان الرياضه بتحافظ على الإنسان من بلاوى كتيير أوى !

طعنة غادرة وطلقات رصاص اصابتنا في مقتل

طعنة غادرة وطلقات رصاص اصابتنا في مقتل قبل ان تصيب جنودنا الذين كانوا يتناولون افطارهم في مكان حراستهم ... كان المفترض ان تكون المواجهة اقوى الا انه يبدو ان جنودنا قد القوا سلاحهم ليتناولوا افطارهم وتناسوا انه لابد من وجود افراد يؤمنوا الاخ

رين حال انشغالهم بتناول وجبة الافطار وهم يقبعون في منطقة حدودية غير مؤمنة ... نعم الحذر لا يغني من القدر لكن يبدو ان هذا الحادث مقصود منه اهانة الجيش وسرقة مدرعته ثم اخفاء معالم الجريمة .... عزاؤنا ان اخواننا ممن سهرت اعينهم على حماية حدودنا انهم قد نالوا الشهادة لانهم من الاعين التي تسهر لحماية حدودنا الشرقية وانهم قتلوا بعيدا عن اهلهم برصاصات الغدر التي لن تعجز العناية الالهية في الانتقام منها وهي لم تراع حرمة الشهر الفضيل ... اللهم من قتل تلك النفوس الطاهرة وتسبب في لوعة ابائهم وعويل امهاتهم فانتقم لنا منه بعدالتك وجبروتك في ايام كريمة .... كيف يا الله وانت الله وهم عبادك ماتوا وهم يؤدون منسكا من مناسكك في شهر فضيل وايام كريمة ... يا رب اظهر عدالتك المطلقة واشف غليل قلوبنا ممن لا يرحم في الارض فارنا فيهم عجائب قدرتك

إذا لم تستحى فافعل ما شئت هذا لسان حال الإخوان

إذا لم تستحى فافعل ما شئت هذا لسان حال الإخوان . يقعدوا مع عمر سليمان في عز الثورة و بعدين يقولولك ضغطوا علينا..يقولك وافق علي الإعلان الدستوري و نعم علشان تدخل الجنة و يتفرجوا علي الأحرار بيدبحوا و البنات بينتهك أعراضها ( علشان ياخدوا البرلمان ) و يقولك بلطجية و بيعطلوا عجلة الإنتاج و ايه اللي يخلي بنات محترمات ينزلوا من بيوتهم و بعدين لما مجلس العار و الخيانة العسكري يلغي برلمان الندامة يقولك إلحق بناتنا إنتهكت أعراضها. يبوسوا ايديهم يعملوا قانون العزل في برلمان الندامة و من رعبهم من مجلس العار و الخيانة العسكري يأجلوه و لما ييجي الكلب شفيق قدام مرشحهم يقولك إلحق اللي ضد الثورة حيبقي رئيس . يقولك الدستورية لازم تضم كل طوائف المجتمع و يستولوا علي ٧٠ في المية منها. مش حنترشح في أكتر من ٣٠ في المية من البرلمان و يترشحوا علي ١٠٠ في المية . مش حنرشح رئيس و إجري رشح واحد علشان مصلحة البلد . يقولك حكومة الجنزوري فاشلة و لازم تمشي و بعدين يعين الجنزوري مستشاره و يكرمه. يقولك العسكر لازم يرجع ثكناته و بعدين يقولك المجلس هو اللي يحدد وزير الدفاع و يصرف أموره بنفسه ملناش دعوة . الدكتور مرسي المغلوب علي أمره يوعد أهالي الشهداء يجيبلهم حقهم و بعدين يكرم قاتليهم و يفطر و يتغدي و يتعشي معاهم . صحيح إذا لم تستحي فافعل ما شئت . 

حاجة تقرف . 

والثورة مستمرة إن شاء الله

مشروع إحلال التاكسى :)

مقدرش أنكر أبداً إنى معجب بمشروع التاكسى الجديد إللى لونه أبيض, وطبعاً أكتر حاجه عجبانى فيه إن فى عداد علشان يوفر على الخناق على الأجره, مع إنى دلوقت بقيت نادراً لما أركب تاكسى

تاكسى, مصر الجديده؟

تعالى

بعد ما ركبت بشويه كده, بصيت للسواق و كان شكله راجل طيب و شعره و دقنه لونهم أبيض و سألته:

كان معاك عربيه نوعها إيه يا حاج قبل مشروع إحلال التاكسى؟

الراجل إتنهد و فتح فى الكلام

"أنا كان معايا 504 موديل 79, دى والله كانت عربيه أصيله بجد, كانت طياره علشان 2000 سى سى, و كانت تقيله و موزونه على الأرض علشان كده تلاقينى واخد على الجرى, ما أنا مكنش بيهمنى حاجه. و كانت واسعه و مريحه و أنا كنت محافظ عليها. دى تمنها فى السوق كان وصل ل70 ألف و ساعات 80, ما هو أصل المشروع ده كان مكسب لناس, و خساره لناس تانيين"

معاك حق يا حاج, أنا كمان بحب العربيه دى جداً و بحس إنها بتاعة شغل

"عارف يا بيه, أنا يوم ما سلمت العربيه للتخريد, و الله العظيم تعبت و رقدت أسبوع فى البيت. ده حتى المهندس إللى إستلم منى العربيه قاللى و الله دى خساره, بس شويه كده و لقيت الونش راح رافع العربيه و رماها فى المقلب إللى بيرموا فيه العربيات على بعضها علشان يخردوها. بصيت للعربيه كده و كنت حعيط, جالى واحد و قاللى إنسى بقى يا عم, و روح إستلم الشيك بتاعك. روحت و استلمت الشيك أبو 5000 جنيه و رجعت البيت رجلى مش شايلانى دخلت السرير ة فضلت راقد أسبوع مش قادر أنزل"

"جيت بعد كده عايز أحجز العربيه الجديده, و الله ما بقيت عارف أجيب إيه, الكورى سريع و موتور كويس بس ورق, الصينى دلع و حركات و كماليات بس مش مجربينه, الروسى ناشف و يستحمل بس كل يوم عند الميكانيكى و وجع دماغ, و كل السواقين محتارين و مش عارفين يعملوا إيه. والله ما فيش زى ال 504"

"المهم, جبت الكورى. تصدق يا بيه, طلعت بيها على طريق السويس كنت بوصل زبون للرحاب, و مشيت على 120, عدت جانبى عربيه نقل لقيت الدركسيون بيلعب فى إيدى, رحت مهدى خالص و قلت خلاص معدتش أجرى تانى, أيام ال 504 راحت خلاص"

"دخلت بعد كده فى موضوع الصيانه, رحت التوكيل فى الطريق الصحراوى, قالولى سيب العربيه علشان ممنوع تخش الورشه و إحنا حنعمل كل حاجه, بعد كده جابولى الحساب و كان غالى قوى, قالولى أصلنا غيرنالك مش عارف إيه و إيه, طيب إش ضمننى إنكم غيرتوا حاجه. أنا من هنا و رايح التصليح كله حعمله عند الصنايعيه إللى أعرفهم بدل ما أنا بتسرق كده"

"بعد كده وزير النقل إتغير, فالشركات إللى كانت بتحط إعلاناتها على العربيات بطلت تحط إعلانات, و مبقوش يدفعوا الاقساط بتاعتهم, فالسواقين إللى اتحملوا الحكايه دى إنهم بقوا يقسطوا على سبع سنين بدل 5, زى ما نكون ناقصين مصاريف"

بس يا حاج, أنا نازل هنا إن شاء الله, إتفضل الحساب......سلامو عليكم

رساله الى رئيس مصر !

مرسي رئيس مصر : سوف نبدأ بمتابعتك والرقابة عليك دون سوء ظن مسبق بك ... فإذا رأينا إصلاحا شكرناك ... وإن رأينا ابتعادا عن طريق الحق نبهناك ... وإن لم تستجب ضغطنا عليك لتصلح ما أفسدته ... وإن لم تستجب ثرنا عليك وخلعناك

ضـــد الثـــورة

شفت بعض الناس بتدافع عن الفنانات إلي نزلوا مدينه نصر لمناصره شفيق وتلصق التهم بسبهم ونشر صور لهم لا تليق بالإ خوان وأصحاب الدقون أحب أرد لك مطلق الحريه في الدفاع عن أي فنانه كيفما تشاء ولكن لا تنسي أن أمثالهم لم يتذوقوا الجوع والذل والفقر مثل الإنسان العادي البسيط أمثالهم يعيشون حياه مريحه مرفهه يمجدون في المسئولين ليقبضوا ينافقوا بكلامهم ليتم الصفح عنهم وعايشين في جلباب السلطه بنعيمها بأي شكل لصور هذه السلطه عكس المواطن العادي المطحون الذي يذوق المرار ليأكل لقمه العيش بحلال دافع وهلل لهم ولكن لا تقارن هؤلاء بالمصريين العاديين..و كل هذا بسبب نظام مبارك جعل من الوسط الفنى و الرياضى رموز و نخبة و صفوة المجتمع و أغلبهم فى الواقع حفنة من الجهلة و المغفلين و المنافقين و الرويبضة و أصحاب المصالح و منهم القوادين و بائعات الهوى .. ببساطة : "تيوس معها فلوس" ..
يتم استغلالهم فى أى مشكلة يواجهها النظام كأبواق إعلامية و ألسنة مدربة تجيد التحدث دفاعا عن النظام و تجيد التمثيل أمام الكاميرات "بحكم المهنة" و هذا لخلق حالة من الرأى العام تساند النظام فيما يواجهه من عقبات ..
إبعاد الساسة المحترمين و العلماء و النوابغ عن الساحة الإعلامية كان مقصودا لتغييب المجتمع و جعله ينساق عاطفيا و فكريا وراء ما ينقله له رعاع الإعلام .