وطنى حبيبى الوطن الأكبر....يوم ورا يوم أمجاده بتكبر
و انتصاراته, ماليه حياته....وطنى بيكبر و بيتحرر
وطنى وطنى
و انتصاراته, ماليه حياته....وطنى بيكبر و بيتحرر
وطنى وطنى
أولاً و قبل أى حاجه بلاش تفهمنى غلط, لحسن تفتكر إنى دايب فى غرام الوطن لا سمح الله, تف من بقك يا راجل أنا مش وش كده, أنا بس كتبت الأغنيه دى علشان حاجه تانيه خالص.
طبعاً الأغنيه – أو بمعنى أصح – الأوبريت ده إحنا تقريباً إتربينا عليه, كلنا كنا بنستناه فى التليفزيون سواء بمناسبه أو غير مناسبه, أى حفله فى المدرسه كان لازم يتغنى, ده أنا حتى فاكر كويس إن طابور المدرسه كان بيطلع الفصول على الموسيقى بتاعته و هى بتتعزف على الأوكورديون.
طيب الكلام ده كان زمان, إيه إللى فكرنى بيه دلوقت؟
بمنتهى البساطه موجه الأغانى إللى بيطلق عليها أغانى سوقيه و بوظت الفن و أذواق الناس و طبعاً هى كتيره أوى دلوقت. و كل ما تسمعها تلاقى الناس تفكرك بزمن الفن الجميل و فين أيام القمم بتوع زمان.............و يااااااااااه.
لقيت نفسى من غير ما أحس حاطط الأوبريت ده فى مقارنه مع أغنية - على سبيل المثال مش أكتر – العنب, على إعتبار إن دى الأغنيه إللى ممكن يتربى عليها الأجيال إللى جايه, فلقيت إن أغنية العنب على الرغم من كل الكلام إللى ممكن يتقال عليها إلا إنها أقرب للقلب و ممكن تحبها أكتر.
حتقوللى إزاى و مش إزاى؟ حقوللك بمنتهى البساطه إن العنب و كل الأغاى إللى زيها على الرغم من إن فيهم كل العبر إلا إن فيهم ميزه كبيره جداً و هى الصدق, و ده إللى عمرك ما حتلاقيه لا فى الأوبريت و لا فى الوطن الأكبر كله. يعنى إنت بتسمع الأغانى دى علشان تضحك و تفرفش و تهيص و ممكن كمان ترقص و إنت من جواك عارف إنها مش أكتر كده, لكن الأوبريت القمه ده بقاله من سنه 1962 لحد دلوقت بيضحك على الناس و بيخدعهم بشعارات العروبه إللى مش نافعه و عمرها ما نفعت و لا حتنفع.
و طبعأ مش ده الأوبريت الوحيد إللى كده, لأ ده فى كتير من النوعيه دى زى الجيل الصاعد و صوت الجماهير .....إلخ. كل العك ده إعتمد فى المقام الأول على اللحن الجميل و النجوم القمم و الديكور و الجو الحماسى الثورى إللى يحببك فى الثوره و يحسسك إن العروبه دى حاجه مفخره لكل من رزقه ربنا بالشرف العظيم ده و إن العرب مستهدفين علشان إحنا ناس محظوظين و عايشين فى نعيم مش موجود فى أى حته فى الكون!!!!!
طبعاً أنا ممكن يتوجهلى كلام من نوعية أصلك مشربتش من نيلها, و لا عمرك جربت تغنيلها, لكن أنا بس عايزك تحكم عقلك و تفكر شويه و إنت بتسمع الأغانى إللى من النوعيه دى, و علشان ماكونش متجنى على أى حد, فأنا جبت شوية مقتطفات من الأوبريت القمه ده, إقراها و احكم بنفسك, بس على شرط لو إقتنعت بكلامى أول حاجه تعملها هى إنك تشغل أغنيه العنب.
وطنى يا مالى بحبك قلبى.....وطنى يا وطن الشعب العربى
ياللى ناديت بالوحده الحره.....بعد ما شفت جمال الثوره
و إنت كبير, و اكبر كتير, من الوجود كله يا وطنى
(أكبر من أمريكا على سبيل المثال لا الحصر يعنى)
************
حلو يا مجد يا مالى قلوبنا.....حلو يا نصر يا كاسى رايتنا
حلوه يا وحده يا جامعه شعوبنا.....حلوه يا أحلى نغم فى حياتنا
يا نغم سارى بين المحيطين....بين مراكش و البحرين
فى اليمن و دمشق و جده.....نفس الغنوه لأجمل وحده
(مجد, نصر, وحده.......أحمدك يا رب)
************
قوميتنا إللى بنحميها....إللى حياتنا شموع حواليها
جنه بتضحك للى يسالم....و جحيم ساير على أعاديها
(العكس صحيح)
************
وطنى يا أغلى وطن فى الدنيا....وطنى يا قلعه للحريه
إنت البانى مع البانيين....و إنت الهادم للعبوديه
الصوت صوتك حر و عربى....مش صدا شرقى ولا صدا غربى
ياللى ترابك كحل لعينى.....ياللى هواك عطره بيحيينى
إنت حبيبى يا وطنى العربى
(إحنا حنهرج !!!!!!!)
************
وطنى يا جنه الناس حاسدينها.....على أمجادها و على مفاتنها
ياللى قنالك رجعت ملكك....و إنت الخير الدنيا صاينها
على السد و خد من خيره....صنع و ازرع و ابنى فى نوره
ياللى علاك فى قلوبنا عباده....يا وطن كل حياته سياده
وطن العزه الوطن العربى
(و الله العظيم أنا ماسك لسانى بالعافيه)
************
(معلش هانت دى آخر حته والله)
وطنى يا زاحف لانتصاراتك.....ياللى حياه المجد حياتك
فى فلسطين و جنوبنا الساهر....حنكمللك حرياتك
إحنا وطن يحمى ولا يهدد....إحنا وطن بيصون ما يبدد
وطن المجد يا وطنى العربى
(لو وصلت لحد هنا يبقى إنت أكيد شخص عنده قوه تحمل رهيبه أحييك عليها)
