لسه يا طيبه عندى فيكى امل

صديقى

أول ما تضيق ..

بشتاقلك أوى يا أعز صديق..

بشتاق لعنيك تبرق

م-الفرحة اما تشوفنى..

لجرائتك ...م- الخوف تخطفنى

 

بشتاق للضحكة

اللى تنور ليل المساجين..

لايديك بتطبطب على كتفى

وكتف التانيين..

ولغنوة انا وانت سمعناها

                       ورددناها ف-قلب الميادين

معقول من سنة

كنت بتهتف هنا فى التحرير؟

معقول سبتنا؟؟

مش كنت بتحلم بالتغيير..؟

واهو صاد الحلم

           رصاص قناص غدار وضرير

مشتاق لك أوى...

واشتاقلك كل مكان وميدان

خطيته بقدمك مره زمان..

وصرخت بعلو الصوت

(ثوار..أحرار هنكمل ميت مشوار)

باتمنى اشوفك فى مظاهرة ..

أو ماسك علمك وبتهتف ضد الطغيان..

واتمنى اسهر وياك سهرة..

وأقوللك والله يا صاحبى زمان

 

باتمنى أكمّل حلمى معاك...

بتمنى وحلمى بيستناك..

واتمنى اشوفك نصر بلدنا المحبوسة ..

                                                       وأشوفك فرح عريس يتزف على عروسة

 

وأشوفك نور بيعدينا على بكره الجى...

واشوفك احلام محسوسة... وأشوفك حى..

                    مع ان دماك لسه ف-حضنى

مشتاق..

وايامك وحشانى..

وكلامك بيرن ف-ودنى..

ارجع نتصاحب من تانى .....

ارجع خدنى

الكلام الجميل اللى فوق دا مش انا اللى كتبه بس الصور دى بتاعتى :) يمكن مبعرفش اتكلم حلو زى ناس كتير بس اللى جوايا بحاول اطلعوا فى الصور

ببساطه احنا مربوطين بدم الشهداء اللى ماتوا دول .. كل واحد فيهم كان عنده امل

نزل من بيت

وباس امه و قالها ادعيلينا

اكن كل اللى فى الميدان دول اخواته و قرايبه

كل واحد من اللى استشهدوا كان عنده هدف اقوى وانبل من اى حاجه

اللى كان عنده حبيبه و اللى كان عنده اخوات بنات و عايز يفرح بيهم

و اللى كانت بتحب حد و اللى كانت مخطوبه و اللى كانت متجوزه

كل واحد من دول بيقولنا اوعوا تسيبوا حقنا

احنا اللى حافظنا على الميدان اللى موتنا فيه

فى موقعه الجمل و يوم جمعه الغضب

اوعوا تسيبوا حلمنا ... واوعوا متححقوش حلمنا

الناس دى نزلت و قالت

عيش حريه عداله اجتماعيه

و الشعب يريد اسقاط النظام

بس لسه النظام موجود و محققناش حاجه غير اسقطنا راس النظام الفاسد

قوووول معايا قول بجد

هيا عيشه ولا موته ولا فوته فى حاره سد

الشعب يريد اسقاط النظام

ويسقط يسقط حكم العسكر

لسه انسان :)