مشروع إحلال التاكسى :)

مقدرش أنكر أبداً إنى معجب بمشروع التاكسى الجديد إللى لونه أبيض, وطبعاً أكتر حاجه عجبانى فيه إن فى عداد علشان يوفر على الخناق على الأجره, مع إنى دلوقت بقيت نادراً لما أركب تاكسى

تاكسى, مصر الجديده؟

تعالى

بعد ما ركبت بشويه كده, بصيت للسواق و كان شكله راجل طيب و شعره و دقنه لونهم أبيض و سألته:

كان معاك عربيه نوعها إيه يا حاج قبل مشروع إحلال التاكسى؟

الراجل إتنهد و فتح فى الكلام

"أنا كان معايا 504 موديل 79, دى والله كانت عربيه أصيله بجد, كانت طياره علشان 2000 سى سى, و كانت تقيله و موزونه على الأرض علشان كده تلاقينى واخد على الجرى, ما أنا مكنش بيهمنى حاجه. و كانت واسعه و مريحه و أنا كنت محافظ عليها. دى تمنها فى السوق كان وصل ل70 ألف و ساعات 80, ما هو أصل المشروع ده كان مكسب لناس, و خساره لناس تانيين"

معاك حق يا حاج, أنا كمان بحب العربيه دى جداً و بحس إنها بتاعة شغل

"عارف يا بيه, أنا يوم ما سلمت العربيه للتخريد, و الله العظيم تعبت و رقدت أسبوع فى البيت. ده حتى المهندس إللى إستلم منى العربيه قاللى و الله دى خساره, بس شويه كده و لقيت الونش راح رافع العربيه و رماها فى المقلب إللى بيرموا فيه العربيات على بعضها علشان يخردوها. بصيت للعربيه كده و كنت حعيط, جالى واحد و قاللى إنسى بقى يا عم, و روح إستلم الشيك بتاعك. روحت و استلمت الشيك أبو 5000 جنيه و رجعت البيت رجلى مش شايلانى دخلت السرير ة فضلت راقد أسبوع مش قادر أنزل"

"جيت بعد كده عايز أحجز العربيه الجديده, و الله ما بقيت عارف أجيب إيه, الكورى سريع و موتور كويس بس ورق, الصينى دلع و حركات و كماليات بس مش مجربينه, الروسى ناشف و يستحمل بس كل يوم عند الميكانيكى و وجع دماغ, و كل السواقين محتارين و مش عارفين يعملوا إيه. والله ما فيش زى ال 504"

"المهم, جبت الكورى. تصدق يا بيه, طلعت بيها على طريق السويس كنت بوصل زبون للرحاب, و مشيت على 120, عدت جانبى عربيه نقل لقيت الدركسيون بيلعب فى إيدى, رحت مهدى خالص و قلت خلاص معدتش أجرى تانى, أيام ال 504 راحت خلاص"

"دخلت بعد كده فى موضوع الصيانه, رحت التوكيل فى الطريق الصحراوى, قالولى سيب العربيه علشان ممنوع تخش الورشه و إحنا حنعمل كل حاجه, بعد كده جابولى الحساب و كان غالى قوى, قالولى أصلنا غيرنالك مش عارف إيه و إيه, طيب إش ضمننى إنكم غيرتوا حاجه. أنا من هنا و رايح التصليح كله حعمله عند الصنايعيه إللى أعرفهم بدل ما أنا بتسرق كده"

"بعد كده وزير النقل إتغير, فالشركات إللى كانت بتحط إعلاناتها على العربيات بطلت تحط إعلانات, و مبقوش يدفعوا الاقساط بتاعتهم, فالسواقين إللى اتحملوا الحكايه دى إنهم بقوا يقسطوا على سبع سنين بدل 5, زى ما نكون ناقصين مصاريف"

بس يا حاج, أنا نازل هنا إن شاء الله, إتفضل الحساب......سلامو عليكم