العقل البضين فى الكرش التخين !

جمله ملهاش اى لازمه فى حيتنا, من كام يوم كنت بلعب كوره, فإفتكرت أيام ما كنت فى المدرسه لما كنت بشوف لوحه متعلقه فى الملعب مكتوب عليها العقل السليم فى الجسم السليم, و أكيد طبعاً الجمله دى كانت موجوده فى كل مدارس مصر, بس السؤال هو إيه مدى تطبيقنا و إقتناعنا بيها

فى المدارس بتعتبر حصه الألعاب دى كلام فارغ و ممكن جداً مدرس العربى ياخدها علشان مزنوق فى المقرر إللى منزلاه الوزاره و كمان لعب إيه و هباب إيه,و إنت جاى المدرسه تتعلم و لا تلعب , جيل آخر زمن, و بالتالى مفيش مشكله إن الملاعب يتبنى عليها مبانى و مفيش أى رياضه فى المدارس و لا جسم سليم و لا أى حاجه

طيب بلاش تلعب فى المدرسه, إنزل إلعب بعد ما تروح البيت, بس فى مشكله, حتلعب فيين؟ طبعاً حتقوللى فى النادى....طيب هو إنت مشترك فى اى نادى؟ طيب معاك فلوس تشترك فى أى نادى؟ طيب الأهم من ده كله حتى لو إنت مشترك فى نادى, أهلك حيوافقوا إنك تنزل تلعب فى أيام الدراسه؟؟

من الآخر كده الأسر المصريه عباره عن شوية ترابيس, يعنى هم عندهم إقتناع غريب إن غلط جداً إنك تمارس رياضه فى أيام الدراسه و إن العيال إللى بيلعبوا دول شويه عيال بايظه و فاشله و مالهومش أهل يربوهم, و علشان كده مش غريب إن الرياضه فى مصر يبقى مستواها ضعيف و تاريخنا فى الرياضه مالوش أى لازمه

إللى أنا عايز أقوله ليه بنعتبر إن فى تناقض ما بين الرياضه و الدراسه؟ بالعكس دول بيكملوا بعض, و عن تجربه شخصيه أنا بحس إن نفسيتى مرتاحه لما ألعب رياضه باستمرار و أكيد دا بيساعدنى فى حياتى عموماً و كمان الرياضه بتحافظ على الإنسان من بلاوى كتيير أوى !